કોણ છપ્પનિયા કાળની સાક્ષીએ નીરખે
ભોગના છપ્પન થાળને?
બંધ પરદાની પાછળ હોંશે હોંશે
કોણ જમે?
કોણ જમે..છોડીને પોતાનાં અગણિત ભૂખ્યાં બાળને?
કોના તાવડામાં રોજ રોજ તળાય
આ ‘લીલા’ નામે મરચાં?
કોણ પૂરે
પરચાભૂખી આંખોને જોવા અઢળક દુર્ઘટનાના પરચા?
ખુદનાં મસ્તકમાં બેઠી ડાકણને કોણ ધુત્કારે?
કોણ
ખુદનાં મસ્તક પર ખુરશી જોરથી ફટકારે!
શ્રદ્ધા નામે રમતનો-
કોણ ખોલે ભેદ?
અંધારિયા અડીખમ કિલ્લામાં કોણ પાડે છેદ?
કોણ નર્મદ? કોણ યોધ્ધો? કોણ વીર?
કોણ નરબંકો?
ઊંઘણશી નગરની નિશાળે
હવે-
‘ડાંડિયા’ વડે કોણ પાડે ડંકો?
Loading comments…