ક્વચિત આશાનાં તાંતણે બંધાઈને આવે છે તરસ,

અશક્યનાં પણ સોણલાંઓને એ સજાવે છે તરસ,

પથ કર્મયોગનો સહેજે આચરણમાં આવી જાયને,

સાકાર કરવાં સ્વપ્ન પોતાનું સૌને લલચાવે છે તરસ,

અહમને સ્વમાનને કદીક ગીરવે એ છે મૂકનારી વળી,

ઇપ્સિત પામવાં કાજે ચમરબંધીને નમાવે છે તરસ,

કોઈકાળે દશા દેખી દુઃખી કોઈની સન્મુખ નઠારીને,

માનવતાને દયાભાવને ઉરનાં ખૂણેથી લાવે છે તરસ,

અતિના સંગમાં આવી લાલચમાં એ પલટાતી શનૈ:,

મૃગતૃષ્ણા પ્રગટાવી માનવનું લક્ષ્ય ચૂકાવે છે તરસ.