ಕತ್ತಲೂರಲಿ ಕಾಣೆಯಾಗಿರುವೆನು
ಹುಡುಕಿ ನೀ ಬರುವೆಯಾ?
ಸಂಕ ಸೇತುವೆಗಳಡಿಯಲಿ ಮರೆಯಾಗಿರುವೆನು
ಹಿಂಬಾಲಿಸದೆ ಮರೆತುಬಿಡುವೆಯಾ?
ಏನೂ ಹೇಳದೆ ಹೋದರೂ ನಾನು,
ಇನ್ನೇನು ಕೇಳದೆ ಸುಮ್ಮನಿರುವೆಯಾ ನೀನು?
ಮನೆಯ ಮಹಡಿಯ ಕಿಟಕಿಯ ತೆರೆಯದೆ
ಮನದ ಬಾಗಿಲನೂ ಮುಚ್ಚಿದೆಯಾ?
ಹಪಹಪಿಸುವ ಮನದ ಮುಂಬಾಗಿಲಲಿ
ರಂಗೋಲಿಯನಿಡದೆ ಸತಾಯಿಸ ಹೊರಟೆಯಾ?
ಹವಣಿಸುವ ಹೃದಯದ ಹಾವ ಭಾವಕೆ
ನೀರೆರಚಿ ನೀ ಹೊರಟೆಯಾ?
ಸಾಲುಗಳ ಕೊನೆಯಲಿ
ಮುಕ್ತಾಯದ ಚುಕ್ಕಿಯನಿಡುವುದ ಮರೆತೆಯಾ?
ಅಳಲಾರದೆ ಕಣ್ತುಂಬಿಕೊಂಡ ಮಗುವನು
ನಡುದಾರಿಯಲಿ ಬಿಟ್ಟು ಹೊರಟೆಯಾ!
Loading comments…