चिंताग्रस्त मनी गोंगाट विचारांचा घोळतो 

खळगी पोटाची भरण्या जीव हा जाळतो 

मारली पावसाने दडी कशी भेगाळली भुई

पाणी रक्ताचे करुन धारा घामाच्या गाळतो

लक्ष्मी होती माय झाली ही लंकेची पार्वती 

काही उरले नाही फुले आसवांची माळतो 

फायदे सारे गरीबास मिळे फक्त कागदावरी  

कायदे शासनाचे नावापुरतेच जो तो पाळतो 

पाश वाढे सावकारी नसे गरजांना अंत हा 

उद्याच्या नवआशेने रोज मरणाला टाळतो