हल्ली तुला लटका राग 

जरा जास्तच येऊ लागलाय

तुला चिडवताना माझ्या

खोड्यांना अजून रंग चढलाय

तुझ्या मागेपुढे भिरभिरत

तुला मनवण्यात मी व्यस्त

कधी कळलं तुला रे हे

मनवून घेण्याचं सुख मस्त

माझ्या मेसेजेसची वाट 

चातकासारखी पाहतोस

मग का बरं वेड्या राजा

तु असा उगाचच रुसतोस

गालावरच्या पुऱ्यांची हवा 

सांग कशी बरं काढावी

की हलकेच टेकवून ओठ

गालांचीही फिरकी घ्यावी

आता हसलास ना मनात

गोड हसू गालात आणून

अरे ही सुद्धा खोडी समज

तुझ्या आनंदित मनातून