ଆଦାମ୍ ନାମକ ଆଦି ମଣିଷଟା ଇଭ୍ କଥାରେ ପଡ଼ି

ଜ୍ଞାନ ଵୃକ୍ଷର ଫଳକୁ ଭକ୍ଷିଲେ ପାପକୁ ଶିରେ ଆବୁରି

ସେଦିନୁ ମଣିଷ ପାପ ପୁଣ୍ୟର ବିଚାରବୋଧ ଜାଣିଲା

ପୁଣ୍ୟକୁ ଭୁଲି ଜ୍ଞାନ ଉପଯୋଗେ ପାପକୁ ଆଦରି ନେଲା

ଫଳ ପତନର ଗତି ଲକ୍ଷ କରି ଆଇଜାକ୍ ନିଉଟନ

ମାଧ୍ୟାକର୍ଷଣର ଆବିଷ୍କାର କଲେ ବଢ଼ିଲା ଆଗେ ବିଜ୍ଞାନ

ବିଜ୍ଞାନ ସେଦିନୁ ଉଦ୍ଭାବନ କରି ଜଳକା କରୁଛି ଧରା

ଉପଲବ୍ଧି ଯେତେ ବିଜ୍ଞାନ ଦିଏ ଧରାକୁ ମଣୁଛେ ସରା

ଫଳ ଭୋଗ ଆଜି କରୁଛି ମଣିଷ ରୋବଟ କରୁଛି କାମ

ମେସିନ୍ ଆଗରେ କର୍ମକୁଣ୍ଠ ଏଇ ମଣିଷ ଛାଡ଼ିବ ଦମ

ଆଲେକ୍ସା ଗୁଗୁଲ ସବୁ କରିଦେବ ଖୁଆଇ ପିଆଇ ଦେବ

ତଣ୍ଟି ମୋଡ଼ିଦେଏ ରାଗରେ କହିଲେ ଜୀବନଟା ନେଇଯିବ

ଫଳ ବିଷୟରେ ଆହୁରି କହୁଛି ଫଳ ଆଜି ବିଷମୟ

କାରବାଇଡ୍ ଦିଆ ମହମ ଘୋଡିଆ ପ୍ଲାଷ୍ଟିକ ଫଳାଶ୍ରୟ

ପରୀକ୍ଷାର ଫଳ କରମରେ ନୁହେଁ ସେତ ଧରାଧରି ଫଳ

ଫଳ ନାଆଁ ଶୁଣି ଜର ଆସିଯାଏ ଫଳକୁ କିଏ ସମ୍ଭାଳ

ଆଦାମ୍ ଇଭ୍ ଅଭିଶାପ ଆଜି ଓଲଟା ଫଳ ଫଳୁଛି

ପ୍ଲାଷ୍ଟିକ୍ ଚାଉଳ ପ୍ଲାଷ୍ଟିକ୍ ଅଟା ପ୍ଲାଷ୍ଟିକ୍ ଅଣ୍ଡା ମିଳୁଛି

ପ୍ଲାଷ୍ଟିକ୍ ଫୁଲ ପ୍ଲାଷ୍ଟିକ୍ ଫଳ ମଣିଷ ଭାଗ୍ୟରେ ଥିଲା

ପରିଶ୍ରମ କଲେ ଫଳ ମିଳୁ କାହିଁ ପ୍ଲାଷ୍ଟିକ୍ ଆସି ପଶିଲା

ଫଳ ଆଜି ନୁହେଁ କରମ ସମ୍ଭୁତ ଈଛାମତେ ଫଳ ସୃଷ୍ଟି

ଫଳ ଶବଦଟା ଲାଜରେ ଲୁଚିବ ଅକର୍ମରୁ ଫଳ ଵୃଷ୍ଟି