యవ్వనమిచ్చే సంపదలు చూసి మిడిసిపడే వారు

సాగిన ముడతల శరీరాన్ని స్థిరంగా ప్రేమించే వారు

లోకమంతా భిన్నమే

నాకు కనిపించేవన్నీ వైవిధ్యమే

ప్రకృతి పారదర్శకంగా ఉన్న చోట

వేణువులు వినిపిస్తూ సెలయేటి చప్పుళ్లకు దారిచ్చే వేళ

ఒక సాయంకాలాన నిన్ను చూశాను

పగటికీ రేయికీ మధ్య దూరం తగ్గేలా 

పొదివి పట్టుకుని కలని నడిపిస్తూ

నీ ఒళ్ళో వాలిపోవాలని ఉంది

అన్యోన్య దాంపత్యం అందుకుని

గాఢమైన అనుభూతులు ముద్దులుగా

మాటలు మరిన్ని చిలిపి చేష్టలు చేసి

నీతో నేను

నాతో నువ్వు

మనలో ప్రకృతి

మన కథ మళ్లీ కొత్తే

ప్రతి సారీ పండక్కి చేసే హడావిడి లాంటి కొత్త

ఆ కథ పేరే శిశిర వసంతం